Thursday 6 December 2012

Papél Juventude Importante Ba Nasaun


TEMPO SEMANAL-AILEU, 06/12/2012

“Hari Ligasaun Entre Juventude Aileu-Lautem Hodi Hakiak Espiritu Konfiansa Ba Malu.”

Foto hamutuk entre juventude Distritu Lautem,
 Aileu no komunidade Suku Aisirimou
dapois de hala’o Estudu komparativu.

BAINHIRA loron matan nakfera husi Loronsa’e no oras hatudu tuku 10:00 otl, uma naruk pinta koor mutin ne’ebe hamrik iha Kapital Aileu (fatin treinamentu Estudante SOLS) nakonu ho ema. Loron ne’e, Juventude husi Distritu Aileu no Lautem marka tan historia foun. Sira hamrik hodi halibur juventude, oinsa bele hakiak no hametin espiritu konfiansa entre juventude.


Kadeira iha aula treinamentu SOLS sira okupa tomak. Plaka ne’ebe hatudu logo Conselu Juventude Distritu Aileu (CJDA)  no Caritas Austaralia, sira hari’i iha ne’eba. Nune’e mós, kuandru metan ne’ebe estudante SOLS uza hodi hala’o treinamentu loro-loron, sira hakerek ho liafuan, “Hari  Ligasaun Entre Juventude Aileu-Lautem Hodi Hakiak Espiritu Konfiansa Ba Malu.”
Liafuan ne’ebe sira hakerek, nu’udar slogan hodi hametin papel juventude. Tanba, juventude mak nu’udar futuru lideransa nasaun nian.

Molok hahu seminariu, juventude husi Distritu rua ne’e, lee mós “Deklarasaun Lifau” ne’ebe fó sai iha Oekusi-Lifau, loron 25 Setembru 2006.

Aliende hala’o seminariu, juventude Lautem mós vizita ba Suku Aisirimou no Suku Liurai hodi buka hatene kona ba historia Distritu Aileu. Iha vizatasaun ne’e, juventude Lautem hamutuk ho juventude Aileu kuda mós ai-oan.

Seminariu loron sorin ne’ebe ho apoiu finanseiru husi organizasaun Internasional Caritas Australia, hetan partisipasaun husi komandante PNTL Distritu Aileu Lodegerio Lay, Administrador Sub-Distritu Aileu Marcos dos Santos no mós patisipa husi Estudante SOLS.

Hafoin loke ofisialmente seminariu ho topiku, Hari  Ligasaun Entre Juventude Aileu-Lautem Hodi Hakiak Espiritu Konfiansa Ba Malu, Administrador Sub-Distritu Aileu Vila Marcos Dos Santos iha ninia deskursu hateten, atividade interkambiu entre juventude importante. Tanba, liu husi atividade hirak ne’e ita bele hametin unidade nasional.

“Ita tenke hametin nafatin ita nia relasaun hodi lori dezenvolvimentu nasaun Timor-Leste iha futuru” dehan Administrador Sub-Distritu ne’e.

Administrador Sub-Distritu Aileu mós rekoinese katak, juventude iha inisiativa di’ak atu dezenvolve sira nia talentu, liu husi atividade oin-oin. Maibe, husi parte Governu mak ladun fó atensaun masimu ba sira nia atividade. (**)

No comments: