Saturday 19 February 2011

Misa Especial Ba Dom Bosco Iha Katedral Dili


Tempo Semanal-Dili, 19.02.2011

Iha lorokraik (19/02) mais ou menus tuku 16.00 OTL, sarani wain saran aan ba halo nakonu igreija katedral Dili hodi hola parte iha misa simu isin mate sao Dom Bosco ninian. Padre sira nia batina hafutar ho Dom Bosco nia letratu nune'e mos sarani barak maka hatais kamija Dom Bosco ninian.

Amo Bispo diocese Dili, Dom Alberto da costa Ricardo iha ninia omilia ba sarani rihun boot, hahi prezenca Urnas Dom Bosco ninian no hateten katak ho prezensa fundador familia salesianu sira nian ne’e bele hametin liu tan paz hodi aijuda hala’o dezenvolvimentu iha nasaun Timor Leste.

Iha biban ne’e dom Alberto relembra fali ukun nain sira, sarani timor leste tomak liu-liu ba foin sa’e nasaun ne’e ninian kona ba kna’ar edukador santo boot no mata dalan juventude sira nian. Obras salesiano sira nian foo funan diak duni ba nasaun Timor leste iha diocese tolu nia laran.

Ho prezensa inspirador no mestre Juventude sira nian amo Alberto abertamente hato’o ninia preokupasaun kona ba problema abortus iha nasaun ne’e. Durante tinan 2010 no inisiu 2011 numeru bebe ne’ebe soe husi ninia inan sira sa’e maka’as.

Iha 2010 mosu kazu restu bebe ida ne’ebe asu han iha parte komoro, ida seluk so’e iha kampu demokrasia, bebe ida so’e besik iha kanu malua ninian no iha ermera. Hahu 2011 populasaun iha ai lok laran hakfodak ho asu dada hela bebe ida nia mate isin.

Iha kometariu padre Rui husi kongresaun Salesiano haktuir hikas dutrina katolika ninian katak abortu ne’e halakon ema nia vida. Padre kapelaun dahuluk TL ba F-FDTL ne’e foo hanoin fali susar ne’ebe Dom Bosco ninia inan hasoru hodi halo esforsu mesak hodi foo eskola ba ninia oan ne’ebe ohin sai ona santo universal ne’e.

Antes atu remata misa Pe. Joao Aparico hanesan ulun boot familia Dom Bosco ninian hato’o ninia lia menom hodi apresia partisipasaun maximu husi parte hotu-hotu iha simu mate isin fundador kongregasaun salesiano sira nian ne’ebe hanesan dahuluk iha istoria uma kreda Timor Leste ninian.

Pe. Provincial Salesiano sira nian ne’e ho matenek wain tebes hodi apelu ba lideres nasaun ninian atu banati tuir izemplu kmanek mestre boot Dom Bosco ninian ne'ebe simu ho basa liman husi sarani sira. Tuir Pe. Joao ninia hanoin lideres sira bele sai mestre ida ke diak ba juventude sira no paz ne’e sei metin iha nasaun ne’e bainhira lideres katuas sira hatene simu malu.

Diskursu Pe. Aparicio ninian ne'e hatudu momos katak rezultadu obra Dom Bosco ninian buras duni iha nasaun loro sa'e tan ba sempre simu ho basa liman.

Partisipa iha ceremonia misa especial ba Dom Bosco ninian ne'e Prezidenti da Republika DR. Jose Ramos horta, Vice Primeiri Ministru, DR. Jose Luis Guterres, Brigadeiru Jeneral F-FDTL Lere anan Timur hanesan mos antigu alunus Fatumaka ninian, Eis PM no Sekretariu Jeral Fretilin DR. Mari Alkatiri no membru do orgaun estadu, estudante husi eskola sira iha Dili laran no sarani parakia sira iha kapital Nasaun ninian.

Ba juventude sira padre ne’ebe ninia idade sei juven ne’e, apela atu hahu halo revolusaun ba sira nia moris rasik banati tuir lala’ok sao dom Bosco ne’ebe halo revolusaun hodi harii kongresaun salesiano tan ba susar ne’ebe juventude sira hasoru iha momentu ne’eba.
Ikus liu Amo Joao dehan nai maromak hadomi duni nasaun ne’ebe foin ukun rasik aan iha millenium ne’e maka hodi delega sao Dom Bosco hodi mai vizita nasaun ne’e hahu husi loron 18/02/2011-07/03/2011.

Misa ne'e remata ho kanta viva Dom Bosco ne'ebe akompania ho basa liman.

Hafoin de misa remata sei kontinua ho adorasaun husi sarani sira iha parokia Dili laran troka malu too dader. (TS)

No comments: