Wednesday 26 January 2011

Taur Matan Ruak Kontente ho rekrutamentu no Joventude Hahi

Tempo semanal-Dili, 26.01.2011

Major Jeneral Taur Matan Ruak, Komandante Jeneral Falintil-Forsas de Defesa Timor Leste (F-FDTL) hafoin enkontru regular ho komandante supremu DR. Jose Ramos Horta iha Dili semana ne’e dehan kontente ho prosesu rekrutamentu F-FDTL maka agora la’o daudaun.


“Ha’u konfia katak prosesu hotu-hotu la’o diak I Timor oan hotu-hotu iha direitu para tuir sein diskriminasaun,” espera eis Xefe Estadu Maior Falintil ne’e.

Prosesu rekrutamentu ne’e halo ba Timor oan hotu-hotu iha territoriu Timor Leste nia laran no iha Dili nota katak estasaun ida iha Palasiu nia oin ne’e de’it simu dokumentus ba foin sa’e Timor oan liu rihun balun ona maiske komisaun sei selesiona de’it novatus F-FDTL nain 600.

“Ha’u haree agora daudauk ne’e sira halo rekoila dokumentusaun I depois iha prosesu tuir mai halo selesaun ba documental, bakonvoktoriu entaun mak ba inspeksaun,” dehan Taur.

Iha tinan 2006 F-FDTL lakon ninia membru liu atus neen hodi adere ba grupu Petisionariu no iha 2010 maka Governu hahu fali rekruta membru foun besik atus neen.

Iha parte seluk maske iha grupu balun maka sei kreia desturbiu hodi rezulta ema balun mate, maibe jeneral Taur dehan katak jeralmente situasaun seguransa iha Timor Leste daudaun ne’e diak liu kompara ho tempu ruma kotuk.

“Diak, situasaun kapas, I iha mudansa barak,” informa Jeneral Taur ba Jornalista sira.

Iha parte seluk wainhira husi observasaun husi publiku kona ba rekrutamentu maka lidera husi sekretaria do Estadu da Defeza, joven balun haksolok.

“Ha’u kontente ho dezenvolvimentu ita nia instituisaun defeza ne’e. Ha’u hanoin lala’ok ne’e tuir duni planeamentu maka iha ona hodi kompleta numeru maka deside ona iha planu 2020 maka sai hanesan mata dalan ba instituisaun ne’e ninia dezenvolvimentu,” komenta Joao M. X. da costa, estudante Universitariu ida iha Dili.

Tuir estudante husi fakuldade direitus iha Universidade mak akreditadu ona husi governu ne’e dehan katak iha prosesu ne’e komisaun presiza haree didiak juventude sira ne’e ninia pasadu no afiliasaun de grupus.

“Ha’u espera katak komisaun selesiona didiak para labele repete hikas petisaun ka hetook aat liu ida ne’e rebeldes foun iha instituisaun maka defende soberania nasaun ne’e nia laran,” Joao sujere.

“Ha’u hein katak lia fuan ne’ebe Sekretariu do Estadu Julio Pinto dehan ona iha tinan kotuk hanesan foo sai iha media katak F-FDTL la iha partidu no grupu nune’e duni kuandu tama F-FDTL sei defende de’it maka interese nasaun ninian. Lia fuan ne’e ninia konotasaun furak nune’e iha treinamentu presiza salin sai hotu tiha husi forsa foun nia ulun tuur ho nia grupu iha dalan ninin hemu lanu tuda ema nia kareta.”

Hafoin de trasforma husi Forsa Gerrilia Falintil iha 01/02/2001, F-FDTL iha de'it membru 650 depois dezenvolve neineik mas beibeik sei sai forsa Moderna ida  tuir planu 2020 F-FDTL sei atinji numeru 3000 forsa regular. Planu ne'e rasik fila kotuk ba estudu maka produz husi Kings College ninian ne'ebe rekomenda numeru F-FDTL metade husi planu 2020. Estudu ne'e rasik hetaan kritikas husi organizasaun internasional balun. (TS).

No comments: