Tuesday 16 March 2010

Manipulasaun Presu materiál Konstrusaun

Julio Alvaro: Prezidente Forum Emprezario de Timor-Leste (FETL) no Prezidente AECCOP / Pakote Referendum Hetan Alegasaun
Dili, Tempo Semanál 

IV Governu Konstitusionál hamosu pakote referendu (PRR) no AECCOP kria espekulasaun presu materiál de konstrusaun hodi halo povu mukit la iha kbiit atu sosa materiál konstrusaun to’o ohin loron tan ba presu sasqaen hirak ne’e la estavel. Antes mosu PRR presu materiál konstrusaun hanesan pregu, simentu, kalén ,besi no seluk tan, iha loja Lay sei normál hela maibé ho PRR Kada Loza idak-idak halimar hasa'e sasaen folin tuir sira nia hakarak no iha loja Lay mosu lista ne'ebé asina husi Prezidente AECCOP, Sr. Júlio Álvaro ho Sr Jimmy Lay iha loron 13/10/2009 ne'ebé hetan protesta maka'as husi Asosiasaun Emprezáriu Baukau iha loron 28/10/2009.
“Sasaen nia folin sa'e maka’as iha timor laran tomak ne’e tan ba iha máfia pazar ne'ebé envolve emprezáriu estranjeiru no envolve mós emprezáriu timor oan ne'ebé hola parte iha konspirasaun hasae sasaen nia folin,” dehan Rui Castro koordenadór PRR distritu Baukau hanesan asinante segundu iha surat protesta ba manipulasaun sasaen nia folin PRR ne'ebé maka sani iha PM ninia oin durante enkontru ho emprezáriu sira iha salaun Konsellu Ministru ninian.


Populasaun een jerál foin maka sente katak materiál konstrusaun ninia folin sa’e ne’e iha fulan Janeiru no Fevereiru 2010 maibé loloos ne’e akontese ona dezde fulan Setembru no Outubru 2009. “Iha pakote Referendu mosu konspirasaun boot ida ne'ebé envolve emprezáriu Timor oan, ne'ebé hanaran an riku liu iha Timor mak hola parte iha hasae sasaen nia folin iha Timor laran tomak,”alega Rui Castro.

Tuir koordenadór PPR husi distritu Baukau ne’e katak nia nunka hafodak bainhira populasaun dada iis boot kona ba materiál konstrusaun ninia folin karun. “Tan ba ami iha lista ne'ebé bele responsabiliza maka hatudu katak emprezáriu boot Timor oan balun envolve iha máfia Pazar.”

Bainhira husu karik nia hatene emprezáriu ne’e se Rui ho fiar an dehan, “ha'u hatene, 100% ha'u hatene no ha'u fiar katak ida ne'e Sr. Primeiru Ministru mós hatene. Bainhira jornál ne'e husu emprezáriu ne'e se loos Rui hataan ho diplomasia katak, “Emprezáriu barak inklui Primeiru Ministru hatene nia. Tan ami aprezenta ona karta ofisial kona ba hasa’e sasaen nia folin iha Pakote Referendu see la sala iha fulan Outubru nia laran maibé seidauk hatene tindak lanjut oin saa.”

Tuir dokumentu ne'ebé jornál asesu hatudu katak surat protesta ho Númeru : 01/SS-ASEMBA /X/2009 alega mosu manipulasaun iha sasaen folin ba Projetu Pakote Referendu (PPR) ne'ebé hala'o husi Presidente AECCOP Júlio Álvaro ho Loza suplaier Materiál Konstrusaun ne'ebé Governu identifika.

Tuir surat ne'e hateten, “ami hare katak “la'os de'it tatoli folin, maibé mosu tiha ona manipulasaun folin, tatoli folin.” 

“Estima saun lucru ne'e Sr. Julio Alvaro hamutuk ho nia kroni-kroni sira hetan bele too US$ 1,000,000.00 ( Juta ida dolar Amerikanu), “surat ne'e dekreta.

Hare husi karta kontratu ne'e deskonfia katak, Loza Toko Lay hamutuk ho Júlio Álvaro halo manipulasaun ba folin sasaen, ne’e duni iha loron Kinta-feira no Sesta-feira Jornalista tenta atu husu klarifikasaun husi Patraun Toko Lay, maibé tuir informasaun ne'ebé Jornalista TS hetan husi ema hirak ne'e serbisu iha loza refere (kaixeiru) hateten patraun la iha fatin nune'e too notísia ne'e hatún jornál ne'e la konsege halo klarifikasaun ba Sr. Júlio Álvaro tan ba sei iha estranjeiru.

Castro kategoriza emprezáriu boot Timor Leste ne'ebé envolve iha espekulasaun presu materiál konstrusaun ne’e hanesan ema ida ne'ebé, “la iha nasionalizmu no patriotizmu. Tan ba ema ne’e halo traisaun ba povu no mós nia sai traidór ba nasaun ida ne'e. Ema ida ne'e, iha ninia vida tomak sempre hanoin de'it atu hariku an no hanehan mós halo terus povu seluk. Ema sira hanesan ne'e loloos fatin ba sira iha Timor ne'e la iha.”

Rui Castro alega katak Prezidente AECCOP ninia lala'ok ne'e hanesan, “oportunista iha bisnis no pelacur bisnis.” Rui promete katak nia prontu responsabiliza ninia lia fuan tan ba ema emprezáriu boot ne'e mak, “ema ne'ebé ha'u hateten ne'e ninia asinatura iha surat laran.” 

“Ami sei hatama ba komisaun anti korrupsaun relasaun ho manipulasaun sasaen nia folin iha pakote referendu inklui mós kazu sira seluk maka mosu iha Pakote Referendu dari aspek logika maupun bisnis tidak masuk di akal kalau kontraktor itu dalam satu perencanan dan pelaksanaan proyek keuntungannya 100% dari nilai penawaran.”

Rui dehan Timor oan sira ne'ebé envolve iha hasa'e sasaen nia folin hodi halo terus povu, loloos ne'e sira labele sente katak sira nia an ne'e Timor oan ida. Rui realsa Primeiru Ministru ninia lia fuan ne'ebé ko'alia sai ona iha enkontru ho emprezáriu tomak iha Delta Nova iha fulan Janeiru 2010 katak emprezáriu Timor oan barak liu investe sira nia osan iha kuartu otél sira iha bali. “Faktu hatudu katak emprezáriu boot sira dala barak manan projetu iha Timor maibé sira nunka halo re investimentu iha Timor tan ba sira gosta liu sosa uma iha bali,” dehan Rui.

Rui Castro dun katak, ho Sr. Júlio Álvaro ninian konkalikon ho loja Lay hasae sasaen nia folin, foo impaktu negativu maka'as ba dezenvolvimentu nasionál no liu-liu ba povu kbiit laek atu sosa materiál konstrusaun hodi hadi'a sira nia knua tanba sasaen sira ne'e nia folin aas too kalohan tutun.

Situasaun ida ne’e hetok aat liu tan kuandu Ministériu Turizmu Comersiu Indústria (MTCI) la kontrola presu materiál konstrusaun no la iha kbiit atu kria sistema ou tau tarzetu ba presu sasaen ho modelu ida. Ho lian Indonézia 'satuan harga,' buat hirak ne'e labele hala'o iha Timor-Leste tanba uza sistema merkadu livre, ida ne'e mak sai kestaun boot.

Governu rasik fó sai ona iha Jornál da Repúblika tuir artigu 16 alínea B katak, “se mak fa'an sasaen la tuir buat ne'ebé mak Governu estabelese tiha ona no hasae presu sasaen folin la tuir regra s sei hetan sansaun hanesan multa osan US$ 1, 000.00 too 10, 000.00.”

Maibé Departamentu Inspesaun Alimentár Ekonomia (IAE), MTCI ninian, too agora seidauk halo intervensaun ba presu Materiál konstrusaun, ne'e duni Emprezáriu hasae ninia presu tuir sira nia hakarak tanba Governu la iha vontade no kbiit atu kontrola tuir Lei ne'ebé estabelese tiha ona.

Nune'e duni Rui Kestiona, “Ministru Gill Alves hanesan Ministru Comersiu Indústria iha autoridade ka lae?, Primeiru Ministru Kay Rala Xanana Gusmão mós uluk hanesan komandante ida hatudu ninia ukun ka lae? Se sira hatudu duni sira ukun ne'e karik sasaen nia folin la sa'e. Nune'e tan ba sira la hatudu sira nia ukun ne'e maka sasaen nia folin sa'e. Se governu ida hare setór privadu no emprezáriu sira hasae sasaen nia folin maibé sira la halo kauza ne'e hamosu pertanyaan boot ida.”

Rui Lamenta kuandu governu la intervein maka maiske governu fornese orsamentu rekuperasaun ba eis IDP krize 2006 no foo subsídiu ba veteranu, ferik katuas, faluk no oan kiak sira mós sei la iha kbiit nafatin atu halo uma ruma too sira mate tan ba sasaen folin karun.

Iha semana kotuk, Armando da Costa ho idade 50 hi'it an ba Loza Victória (Kolmera) atu sosa pregu no kalén maibé fila ho oin triste. Ho dada iis Armando dehan, “ai koitadu ha'u lori osan 'seratus dolar' de'it mai atu hola kalén ho pregu, maibé osan ne'e la too tanba kalén tahan ida nia folin U$ 3.75. Ha'u sente ne'e karun loloos, ha'u fila liman durante ne'e, rai osan hodi hola kalén no pregu atu hadi'a ha'u nia uma, mais la bele tanba folin karun loos.”

Maibé Deputadu Manuel Tilman, membru Komisaun C asuntu Ekonomia no Finansas Anti Korrupsaun defende emprezáriu sira no husu governu atu foo subsídiu ba materiál konstrusaun hanesan halo ba foos. “Se la iha subsídiu ba materiál de konstrusaun folin bele sa'e tun konforme merkadu ne'e duni loja sira la iha kulpa ida so governu maka atu prevene hodi fasilita buat ida hanesan pakote referendu ne'e tuir mai sei iha pakote de dezenvolvimentu entaun governu tenke obta ou subsídiu ba emprezáriu.” 

“Ha'u la hatene povu hirak mak halo uma, maibé di'ak mak Asosiasaun AECCOP hanesan Sr. Júlio Álvaro ho sira nia amigu sira mak manan osan barak tanba sira ne’e hatene osan hira mak Governu a loka ba konstrusaun,” dalen Manuel.

Iha parte seluk, Dekanu Ekonomia Cristóvão dos Reis dehan, materiál konstrusaun nia folin sa'e, “tanba la iha regra s no la iha Lei atu regula kona ba sasaen folin ne'e duni emprezáriu no negosiante sira hasae presu sasaen tuir sira nia hakarak.”

Dekanu UNTL ne'e realsa, “emprezáriu sira aproveita tempu ida ne'e hodi hasa'e presu sasaen, tanba la iha regulamentu atu regula presu sasaen no la iha kontrola saun husi Governu.” 

“Dezenvolvimentu, la signifika atu hari de'it konstrusaun boboot hanesan hari edifísiu no hadi'a estrada, maibé presiza mós halo mudansa ba povu nia moris. Realidade hatudu, povu ki'ik ne'ebé presiza hakarak halo uma, ohin la bele halo buat ida tanba sasaen folin sa'e aas tebes,” nia esplika.

Nia sujere, “Di'ak liu Governu hala'o regulamentu ida hodi regula Emprezáriu sira, maibé regulamentu hirak ne'e presiza aplika no kontrola. 

“Folin materiál konstrusaun hanesan simente, besi, ai, kalén ho seluk-seluk tan, ema barak sempre kolia hela de'it. Mais Governu halo finzi la rona no taka tiha tilun sorin no husik de'it tilun sorin.”

Atu konfirma preokupasaun husi komunidade jornál ne'e tenta ba iha MTCI maibé haruka fali ba departamentu inspesaun Alimentár Ekonomia. “Ha'u hanoin materiál nia presu ne’e Komérsiu Indústria mak tenke fó nia tabela, hodi nune'e ami bele hare hodi hala'o Inspesaun ba sasaen nia folin,” esplika Xefe Departamentu Inspesaun Alimentár Ekonomia José Ferreira Martins. 

Departamentu ida ne'e mós kuran ema, “Ami ema na'in haat (4) de'it, ida ne'e limitadu tebes nune'e to’o agora seidauk hala'o Inspesaun ba materiál hirak ne’e. 

“Atu hatene presu barak ou uitoan ami tenke hare ba tabela. To’o agora sira (MTCI) seidauk fó tabela atu nune'e ami nia Departamentu bele hare presu sasaen nian, ”tenik Martins ho oin triste.

Iha 07 Setembru 2009, Toko Lay haruka lista ida ba Ministru Pedro Lay ne'ebé a lista materiál konstrusaun ninia folin sei baratu sentavu lubun ruma no iha fali lista ida akordu entre asosiasaun Emprezáriu Baukau ho Loza Lay iha loron 16 fulan hanesan ninia presu menus uitoan maibé asinatura Presidente AECCOP 13/10/2009 hasae liu tan presu materiál konstrusaun. 

Iha loron 4 Juñu tinan 2008, Parlamentu Nasionál (PN) aprova ona Lei Tributária ne'ebé hodi halo redusaun ba taxa importasaun maibé realidade hatudu folin iha merkadu sa'e aas nafatin, kestaun ne'e mosu karik tanba Lei Tributária seidauk implementa ho loloos.


No comments: